استاذة كذيه وحصولها على رخصة القيادة من أول تراي

بسم الله الرحمن الرحيم ،ابدأ قصتي ومشواري في التدريب : قررت اتدرب لان كنت اشوف اخواني وخواتي كلهم يتدربون ، فقلت ليش ما أتدرب نفسهم ؟! طبعا انا ما كان عندي هدف لليسن ابدا ، اخترت مدرب من اهلي وقريب منا وتدربت معه. أول شيء تدربت شارع على اساس يكون معي سيطره في السياره و تحكم فيها لمدة اسبوع ، من بعدها انتقلت لمرحلة البراميل وبالنسبه لي كانت اسهل مرحلة ، كنت اخذ المقاسات صح وقررت في نفسي ليش ما اخذ مقاسات غلط عشان لو صار لي واخطأت في وقت التراي اعرف كيف اتصرف . وبالفعل كنت اخذ مقاسات غلط والمدرب كان يصرخ علي وانا مطنشتنه لحد ما جاني عند السيارة ويتنازع جدام الناس😩 وبعدها خبرته انه لو غلطت في التراي انا ما اعرف كيف اعدل وفهمني وجلس معي وراقب إلي انا اسويه .والشي الجميل من هذا خلاني اكتشف احطائي واصلحها.

 جلست تقريبا اسبوعين في التدريب وقرر انه يقدم لي تراي ، وكان طول فترة التدريب يهددني لو رسبتي بذبحك😟 وانا شاده حيلي ، وجاء اليوم الي قدما فيه التراي ، دخلت الاشارات والحمدالله جاوبتهم كلهم صح إلا افسح الطريق ما اعرف ليش جاني زهايمر فيها 😂وبعدين تذكرتها اخر لحظه. وانتظرت دوري لحد ما وصلت جنب الشرطي واخذ مني الكتشه ودخلت ع جهة اليمين واموري طيبه ودخلت في اليسار و الامور طيبه لكن فجأه صار هواء بقوة🤦‍♀️ وشفت الفاحص يأشر لي انه تقدمي على جدام وانا ما صدقت الخبر😢 وحركت السيارة وطلعت وما شفت المدرب غير يتنازع مع الشرطي يقوله ليش خليتها تطلع ، قاله دعمت ، كيف دعمت وهي فاتح معها من كل جهة ، يقول انا سمعت صوت انه دقت في الدرام.

 المهم بعد 5 أيام قدمت التراي الثاني وانا فيني خوف ارسب و احصل منازع ، ولكن الحمدالله نجحت وانتقلت لمرحلة الشارع ، شهر كامل وانا اتدرب شارع وكل ما اطلع التدريب اقول متى بتخلص الساعة ، كان كلما اغلط يتنازع ويصارخ عليي المدرب☹😢 ويخليني اسوق من الرستاق الى السويق ويجبرني اتجاوز شاحنات بدون ما اخاف .

 وتدربت في كل المواقع إلي في الرستاق وطاح لي القلعة وقدمت وانا اول وحده طبعا والله ماكنت خايفه من الفاحص كثر خوفي من المدرب مسولي رعب وارتجف😖 ، وانطلقنا ووصلنا الموقع ولما رجعنا ووقفنا كنت انتظر منازع يجيني من الخلف ، لكن انا ف نفسي قلت ليش ما اشرد قبل لا يتكلم الشرطي عشان ما ينازعني قدامه ، نزلت وبعدا ركبت متدربه ثانيه كان معها فحص وانطلقوا ، لما رجعوا جاي يتنازع ليش نزلتي الفاحص يريدك ، طبعا انا رجعت للفاحص وقالي ما يصير تنزلين لحد ما يأمرك الفاحص ، قلت له كنت مرتبكه وياريتني مرتبكه من الفاحص .المهم قالي مبروك وكان ادائك ممتاز 😍🤩، وقتها قسم كنت شويه وابوس الفاحص من راسه نسيت نفسي التراي الاول طبعا جبته من بعد ما خلاني مدربي انسانه تتحدى خوفها في السياقه و تاخذ الليسن من التراي الاول.