جواهر وحصولها على رخصة القيادة خلال 35 يوم فقط

طبعا حالي حال أي شخص يريد يحصل على رخصة القيادة وجلست أنتظر الفرصة المناسبة عشان أبدأ التدريب ، ولما صارت ماترددت ولا لحظه طبعا ، تعرضت للتحبيط والمماطله من الناس القريبه مني (لا تاخذي الليسن ، وشو تبين فيه و مابتنجحي وكثير من هالكلام لدرجة في شخص قال لي تفلي فوجهي إذا خذيتي الليسن). المهم وبدون اي تردد سرت مركز الشرطة وطلعت الكتشه ورسلت لمدربه قريبه من البيت تدربني على البراميل و الصعدة وعلى طول وافقت. وبديت في اليوم الثاني ، دربتني اسبوع كل يوم ساعة . 

ما أخبركم شكثر كنت متحمسة وحاطه هدف نصب عيني و بوصله بأي طريقه . طبعا من تخلص ساعة التدريب رجعت البيت وخذيت لي دفتر 100 ورقة وهنا بديت أرسم البراميل و أشرح لنفسي نفس شرح مدربتي بالضبط. واليوم التالي أسير اتدرب بعد الغدا. وعلى فكرة انا بنت متزوجه وعندي ولد وبنت واسوي شغل بيتي وألف شغله براسي ، والمدربه تدربني 10 دقائق وتسير عني بيتها تخلص كم شغله ، وعاد أنا أدخل و اطلع من البراميل وهي واثقه فيني عشان كذا تخليني بروحي. كملت 5 أيام تدريب و المدربه لاحظت اني متمكنه وقالت لي بتقدم لي تراي، وأنا رجعت البيت ومسكت دفتري وراجعت لنفسي ودفتر الاشارات حفظته صم الله وكيلكم، لدرجه انا واسوي شغلي الدفتر بأيدي . ما أقول لكم اني ما توترت وحسيت برهبه شوي ولكن هدفي نصب عيني وواثقه من نفسي جدا. 

نمت من وقت هذيك الليلة واذكر قمت قبل اذان الفجر وخذيت لي شور وسويت فطوري وصليت وفطرت و الساعة 5:30 انا عند المدربه، استغربت من نشاطي ودقة الموعد ، قالت لي 5:30 تكوني في الحوطة وبنفس الوقت انا كنت هناك ودفتري بإيدي. وهي جدا فخورة فيني وتشجعني وتقول عندي احساس اليوم بتنجحي انتي قدها. وصلنا ولله الحمد المركز (ولاية عبري) وهنا شفت الكثير من الطلاب يقدموا الترايات للبراميل و اشوف بعيني الاخفاق و الرسوب و الاخطاء ، وفيه طلاب ينجحوا بعد وأنا استغفر ربي واذكره وكنت متوتره شوي ولكن تمالكت نفسي وأعصابي واستغليت الوقت بمراجعة الدفتر و الاشارات. حان دوري اقدم اختبار الاشارات ، كنت جدا متحمسة وتوفقت الحمدالله ، وبعدها خبرتني المدربة أركب السيارة وحدي واسوق لحد ما يوصل دوري. وكان تقريبا 12 طالب قدامي يقدموا الاختبار وانا انتظر دوري بالسيارة وكل وقتي اذكر ربي و استغفر واخذ نفس عميق جدا عشان اخفف التوتر مني ، لما صار دوري قالي الشرطي يالله جواهر نبدأ . ودخلت بين البراميل ورجعت من اليمين وقالي احسنتي كملي ولما رجعت من اليسار قال يالله صعدة وروحت الصعدة واجتزتها و الشرطي يزقر عليي ألف مبروك ناجحه😍 هنا هم وانزاح عن قلبي وارتحت وفرحت كثييير والمدربه كانت جدا فخورة فيني😊 وخلصت براميل ونجحت الحمدالله بالتراي الاول وقررت ابدي شارع على طول ولكن مع مدرب آخر. 

ما أخبي عليكم المدربه يلي دربتني كانت جدا ممتازه ولكن انا حبيت التغيير وكنت فقط مسويه عقد براميل معها. وكنت سمعانه عن مدرسة بن عيد وحبيت اتدرب عندهم وتواصلت مع الاستاذ وليد الوائلي وخبرني عندهم فرع في عبري ويشرف عليه الاستاذ خليل الوائلي ، واتصلت فيه ووافق يدربني ولكن اروح له عبري يوميا عدا ايام الاجازات . وانطلقت كل يوم اتدرب أول يوم ماعرفت شرقي من غربي ونجرت الدنيا فوق تحت😂 ولكن مع استاذ خليل سيطرت على نفسي وتمكنت من السياقه في وقت قصير  كنت ارجع من التدريب وامسك دفتري وأسجل الملاحظات يلي عطاني اياهم المدرب ورسمت كل الدوارات والتقاطعات والمواقف واجلس اشرح لنفسي واذا حسيت بصعوبه ارسل للاستاذ خليل استفسر منه وهو يعدلي دائما. وكان عنده كراسه في السيارة ويشرح لي فيها قبل الانطلاقه وكنت بعد ساعة التدريب أساله عن ادائي وهو يخبرني كل اخطائي وبعد اسبوعين قرر استاذ خليل يقدملي تراي وهو متفائل فيني وواثق من سياقتي وانا كنت حاسة نفسي ماجاهزه للتراي ولكن بثقة المدرب وتشجيعة قدم لي تراي يوم الاربعاء تاريخ 28/12/2018

 قبل يوم التراي تدربت وراجعت دفتري وملاحظات المدرب ونمت هذيك الليلة من وقت واذكر صليت الفجر مرتين من التوتر😂 وروحت عبري مع زوجي ولاقينا المدرب وكان التراي في موقع (الريالين) . وانا انتظر دوري وصل الفاحص و ركب وسلم عليي واستلم الكتشه وقال لي انطلقي ، طبعا من قوة التوتر في البدايه حسيت بارتباك وطلعنا التراي وما أوصف لكم أخطأت خطئين : الاول: وقفت في النص بالتقاطع والثاني: لما قالي استدارة على طول دورت اقرب استدارة وكان عليها اشارة ممنوع الدخول طويله عريضه ودقني الحول عنها 😂😭واساسا كنت ابا انتقل لليسار وشفت اللوحة ورجعت لليمين وبعدين رجعت الفاحص للموقع ودقني بختم (راااااسب) 😭وبعدها طاحن الدموع وقرر استاذي يرجعني مرة ثانيه أعدل الاخطاء يلي سويتهم بالتراي وصراحة هو ماقصر معي ابدا في التدريب وربي يعطيه الف خير.

 دربني اسبوع من بعد التراي وكنت مركزه أكثر ومتحمسة أكثر وتاريخ 11/12/2018 كان موعد التراي القادم يوم الثلاثاء ، وعاد ما اخبركم كيف ترست الدفتر رسم واشرح حتى وانا امشي واشخبط والكل يضحك عليي قبل التراي نمت من وقت وبعد قمت من وقت وبكل حماس وصليت الفجر مرتين مره من التوتر😂 ، واذكر هذيك الايام كنت رايحة التراي و الدنيا ضباب. وصلت هناك وكان في موقع (مسجد المجرفي) وكان استاذي ينتظرني وانا اول وحده يفطر عليها الفاحص (ناصر الغافري) انسان جدا محترم وخلوق وقلبه طيب. سلم عليي وسلمت عليه ونشدته عن العلوم ، قالي لي طلعي قلت له حزامك قال خليه حزامي وطلعي ، المهم لبس حزامه وطلعنا وأذكر شبر مشيت وعطاني باركن يمين وبعدها طلعني من تقاطع يسار ووداني دوار كامل يمين ووداني شارع خدمات ومن ثم دخلني شارع عام ورجعنا وقال خذي باركن يسار وخذيت. ما اقول لكم ماكنت متوتره ولكن تغلبت على التوتر لاني اريد الليسن وما عندي استعداد اتخلى عن حلمي، واول ما وقف السيارة شفته يشخبط بالكتشه وحطيت ايدي على قلبي وقالي احسنتي وجزاك اله خير وألف مبروك😍 وهنا حسيت بفرح وسعاده و الدنيا ماا واسعتني واشوف الفخر بعيون مدربي. ونجحت وخذيت الليسن بثاني تراي. وكل الشكر والتقدير لمدربي خليل الوائلي وما انسى فضل دروس قناة مدرسة بن عيد.