مسيرة تدريب تستغرق 4 سنوات تنتهي بنجاح من التراي الاول

بدأت اتعلم السياقه سنة 2018 ، وطبعا تعاقدت مع مدربة مبتدأه في التدريب ، تعاقدت معها على مرحلة البراميل وبصراحه قامت بتدريبي فقط اسبوعين ، وكنت ما افهم عليها ابدا لانها غير قادرة على إيصال المعلومة ، وطريقة شرحها غير واضحه بالنسبه لي ، فقط استخدمت الرسومات لتوضيح متى أكسر مقود السيارة ، وانا بصراحة كنت ما قادرة ولا متمكنه من مسك المقود بالطريقة الصحيحة أو التحكم في البريك !! بعدها بديت ابحث في اليوتيوب عن شرح مبسط للبراميل لعل وعسى أفهم الطريقه، والحمدالله حصلت شرح قناة بن عيد وكان الشرح للامانه واضح جدا وسهل ، ولكن ما كان معي مدرب يدرب بطريقه اقدر من خلالها افهم البراميل ، ولكن تابعت الدروس الموجودة في القناة وقدرت منها انجح في البراميل والصعده ولله الحمد. ولكن مازلت غير متمكنه من التحكم في المقود ، فقررت اتوقف عن التعليم لفترة 

ومن ثم رجعت للتدريب في مسقط في القرم سنة 2019 لاستكمال مرحلة الشارع ، تدربت مع مدربة كان تدريبها ممتاز ولكن ماقدرت تتوصل لنقاط ضعفي فالسياقة ، كان عندي خوف ورهبة من الشارع وافتقد كثير اشياء منها الثقه وعدم القدرة على السيطرة والتحكم بمقود السيارة رغم اني تدربت شهرين تقريبا .. وبسبب ظروفي توقفت عن التدريب مرة اخرى ، ولكن رجعت اتدرب في سنه 2021 ، وتعاقدت مع مدربة اخرى ، لكن للاسف كانت كثير تحبطني وابدا ما عطتني دافع اكمل سياقة، كنت احس انه موضوع صعب ومستحيل في يوم اسوق وكنت دائما ارجع للبيت ابكي ونفسيتي منحبطة واعصابي تلفانه . رجعت مرة ثانية اتصفح اليوتيوب ورجعت اتابع دروس الشارع في قناة بن عيد ، وكنت احفظ الدروس بالضبط ولكن ينقصني مدرب يعطيني تعليمات صح ويشيل الخوف الموجود بداخلي .

 فقررت اتواصل مع الاستاذ وليد وشرحت له معاناتي وكان اسلوبه جدا راقي ومريح وشجعني اتدرب مع الاستاذ علي. اول ما طلعت عند الاستاذ علي ، كان اسوبه محترم جدا وقدر يتوصل لنقاط ضعفي بدون لا اتكلم ، عالج نقاط ضعفي كامل ومنها عدم السيطرة ، الاستدارات ، التحكم في المقود ، والانعطافات ، والاكثر انه كان دائما يشجعني ويحفزني اتعلم واعدل اخطائي . واسلوبه المحترم وشخصيته خلتني اتعلم واسمع نصايحة واركز في كل كلمة يقولها. وجاء اسبوع تقديم التراي ، اعترف اني كنت متوتره وخايفه لكن بصراحة استاذ وليد عطاني دافع وكلام ايجابي والحمدالله رحت يوم تقديم التراي متحمسة مع وجود خوف بسيط ، لكن اصراري وعزيمتي خلتني اقدم كل مجهودي واكون مركزه واحصد النجاح من التراي الاول ولله الحمد ..